தெருவிளக்கு

சாதிமத பேதமில்லா
பெருவிளக்கு சூரியன்!
சாதிமத பேதமில்லா
சிறுசூரியன் தெருவிளக்கு!

நாம் விழித்தால் உறங்கும்,
நாம் உறங்க விழிக்கும்,
ஊர்க்காவலன் தெருவிளக்கு!

எம்வீட்டு எரிவாயு
அடுப்பெரிய காரணம்
எந்தையின் கல்விக்கு
அருள்செய்த தெருவிளக்கு!

அந்த ஒரு தெருவிளக்கு
பொசுக்கியது ஒரு மனிதனின்
அறியாமை அல்ல! - ஒரு
சந்ததியின் அறியாமை இருளை!

தெருவுக்குத்தெரு உயர்ந்து நிற்கும்
தெருவிளக்கு, தரம் உயர்த்திய
சந்ததிகளின் எண்ணிக்கை என்ன?
எண்ணிமுடிக்க எவரால் முடியும்?

எதிரி கூட்டம் நடுவே கம்பீரமாய்
நடைபோடும் நாயகன் போல,
இரவெல்லாம் இருள்!
இடைஇடையே தெருவிளக்கு!

வானவில்

மழைத் திருவிழாவின்
தோரணமே வானவில்லே!
தூரிகையின்றி இயற்கை
வரைந்த ஓவியமே!
நீ எங்கு தொடங்கி
எங்கு முடிகிறாய்?

கதிரவன் உன்
நண்பனா? எதிரியா?
அவன் கதிர்களால்
நீ எழுகிறாய்!
ஆனால் அவன்
எதிரே நிற்கிறாய்!

குளிரும் மழையும்
சுடும் கதிரும்
சேரும் பொழுது
வரும் வானவில் - நீ
சொல்லும் நியதி,
இன்பதுன்பம் இணைவதே 

அழகிய வாழ்வு!

மழை பொழிய 
காத்திருக்கும் நாங்கள்
மழை ஓயவும்
காத்து இருக்கிறோம்
உனக்காக!